...
АТАҚ немесе ҮШ СӨЗ
🌙
"Мені білмей тұрған өзі бұл қайсың?" –
Деп кеуделеп толқын атып тулайсың.
Мансабыңа жүрген кезде масайрап,
Мерт боласың.
Сосын қайтып тумайсың.
🌙
Аяқасты аяқталып сапарың,
Қалады артта шен-шекпенің, шапаның.
Көрге бірге кіруге де жарамас,
Бір кездері жерді жарған атағың.
🌙
Көз жұмған соң
Біреу келіп, Құдай-ай!
"МӘЙІТ қайда?" - деп сұрайды тым оңай.
Кебіндейді жуындырып жəй ғана,
Атақ түгіл атыңды да сұрамай.
🌙
Тірлігіңде түрлі атаққа лайықсың,
Өлгеніңде мүлəйімсің, мəйітсің.
Көрге түспей көкірегің көк тірер,
Көрген түстей енді, міне, ғайыпсың.
🌙
Содан кейін
Имам келіп, Құдай-ай!
"МАРҚҰМ" - дейді,
Айтады оны тым оңай.
Едел-жедел жаназаңды оқиды,
Тергеп, тіпті, тегіңді де сұрамай.
🌙
Тірлігіңде асыл, күміс, алтынсың,
Өлгеніңде мақұрымсың, марқұмсың.
...Неге бүгін самарқаусың, салқынсың,
Айтшы, кəне,
Айтшы, маған,
– Ал, кімсің?
🌙
Содан кейін,
– Алыңдар! – деп, "ТАБЫТТЫ",
Қырға қарай бастайды Имам халықты.
Суық көрге жалғыз өзің кіресің,
Сыртқа тастап атақ, мансап, даңқты.
🌙
Тірлігіңде
Алатаусың,
Алыпсың,
Өлгеніңде төбешіксің, табытсың.
Ғәділетті құдіретке жүгінбей,
Ғапылдықпен ғұмыр кешсең,
Ғəріпсің!
🌙
Тірлігіңде жүрмесең де тыс көзден,
Түбі осылай болатынын іш сезген.
Үш буылып аттанасың ақырға,
"Мәйіт"
"Марқұм"
"Табыт" деген үш сөзбен.
#ҚалқаманСАРИН
#КалкаманСАРИН
#QalqamanSARIN
Kalkamansarin.kz
